اسلام آباد۔4ستمبر(اے پی پی)نگراں وزیراعظم انوار الحق کاکڑ آکھیے جو پبلک پرائیویٹ پارٹنرشپ ودھا تے حکومتی اخراجات اچ کمی اتے منصوبیاں اچ بہتری کیتی ونڄ سڳدی اے، ایں سانڳے ٻئے مواقع ڳولݨ دی لوڑھ اے، بنیادی ڈھانچہ دی ترقی نال رابطے ودھسن اتے قومی اتحاد تکڑا تھیسی۔ او اسلام آباد اچ پبلک پرائیویٹ پارٹنرشپ اتھارٹی بارے اعلیٰ سطح اجلاس دی اڳواݨی کریندے پئے ہن۔ اجلاس اچ نگراں وفاقی وزیر منصوبہ بندی سمیع سعید، مشیر وزیراعظم احد چیمہ، ڈپٹی چیئرمین پلاننگ کمیشن محمد جہانزیب اتے متعلقہ سرکاری افسران شرکت کیتی اتے وزیراعظم کوں پبلک پرائیویٹ پارٹنرشپ اتھارٹی دی کارکردگی تے تفصیلی بریفنگ ݙتی۔ وزیراعظمملکی ترقی اچ حکومتی اتے نجی شعبے دے ڳانݙھے کوں اہم قرار ݙتے جو موٹرویز اتے شاہراواں ٻݨاوݨ کیتے پبلک پرائیویٹ پارٹنرشپ ٻئی ودھاوݨ دی لوڑھ اے، انفراسٹرکچر ڈویلپمنٹ نال رابطے تجڑے تھیسن، ملک دے مغربی علاقیاں کوں مشرقی علاقیاں تئیں چنڳی رسائی ݙیوݨ کیتے ایسٹ ویسٹ کنکٹیویٹی دا جامع پلان ݙتا ونڄے۔ اجلاس اچ ݙسایا ڳیا جو نجی و سرکاری ساڄھے داری نال 646 ارب روپے دے منصوبے شروع کیتے ڳن، ایں سانڳے حکومت سبسڈیز کیتے 150 ارب روپے دی براہ راست بچت کیتی اے جیندے اچ صحت، تعلیم، انفارمیشن ٹیکنالوجی اتے برآمدی شعبے ترجیحات ہین۔
