اسلام آباد۔13جون(اے پی پی)سپیکر قومی اسمبلی سردار ایاز صادق اسرائیل دے ایران تے حملے دی شدید مذمت کریندے آکھیے جو اسرائیلی جارحیت ایران دی خودمختاری تے حملہ اے۔ جمعہ کوں اپݨے مذمتی بیان اچ انہاں آکھیا جو اقوام متحدہ ایران تے اسرائیلی جارحیت دا نوٹس گھنے، ایران کوں اقوامِ متحدہ دے آرٹیکل 51 دے تحت دفاع دا مکمل حق حاصل اے، پاکستان دی پارلیمان اتے عوام ایران دی عوام دے نال مکمل یکجہتی کریندن، اے اسرائیلی اقدام علاقائی امن و سلامتی کیتے سنگین خطرہ اے۔ انہاں آکھیا جو عالمی برادری بین الاقوامی قوانین دی خلاف ورزی دا نوٹس گھنے۔ سپیکر قومی اسمبلی خطے دے امن و استحکام کیتے اسرائیلی اشتعال انگیزی کوں روکݨ تے زور ڈیندے آکھیا جو اسرائیلی حملے بین الاقوامی قوانین اتے اقوامِ متحدہ دے چارٹر دے منافی ہین۔
