اسلام آباد – 20 – ڊسمبر (اي پي پي) وزيراعظم جي ڪشمير ۽ گلگت بلتستان معاملن واري صلاحڪار قمر زمان ڪائره چيو آهي ته اسان کي ملڪ ۽ قوم جي بهتر مستقبل جي لاءِ پنهنجُون قومي عادتون تبديل ڪرڻيون پونديون، ڪفايت شعاري ۽ توانائي بچت جي تجويزن تي فوري عملدرآمد ۽ امپورٽ بل تي ضابطو آڻڻ لازمي آهي، 26 کان 28 بلين ڊالر جي امپورٽ بل ۾ مسلسل اضافو ٿي رهيو آهي. وفاقي ڪابينا جي اجلاس کانپوءِ پريس ڪانفرنس کي خطاب ڪندي وزيراعظم جي ڪشمير ۽ گلگت بلتستان معاملن واري صلاحڪار قمر زمان ڪائره چيو ته پاڪستان پيپلزپارٽي پنهنجي ورثي موجب حڪومت جي ڀرپور ترجماني ڪندي بلاول ڀٽو زرداري عوامي امنگن موجب پاڪستان جو ڪشميرين جو هندستان ۾ رهندڙ مسلمانن جو ۽ ٻين اقليتن جو ڪيس دنيا آڏو رکيو آهي، اسان سڀ کان وڏي دهشتگردي جو شڪار ملڪ آهيون، دهشتگردي سان پاڪستان جو جاني ۽ مالي نقصان سڀ کان وڌيڪ ٿيو آهي، بلاول ڀٽو زرداري گڏيل قومن جي ڪانفرنس ۾ پڻ اهو آواز بلند ڪيو جنهن جي خلاف هندستان ۾ وڏيون رڙيون نڪتيون، پر ڪجهه به ٿئي سر جي قيمت لڳايو، اسان کي سرن جي پرواهه نه آهي، پاڪستان جي ڪيس کي پٺتي ٿيڻ نه ڏينداسين، انسانيت جو ڪيس اڳيان رکنداسين، اهو ئي اسان جو فيصلو آهي ۽ اسان کي پنهنجي ليڊر تي پنهنجي تي پنهنجي وزيراعظم تي فخر آهي ۽ اڄ وزيراعظم ۽ ڪابينا انهن کي ساراهيو آهي ۽ پوري قوم انهن سان گڏ بيٺل آهي. هن چيو ته ملڪ هن وقت يقينن مشڪل حالتن ۾ آهي، ميڊيا ۾ به اهو ئي چيو پيو وڃي ته ملڪ ۾ تمام وڏو بحران آهي. هن چيو ته اپوزيشن ليڊر عمران خان روزانو اسان جي مٿان ۽ ملڪي معيشت تي هڪ نئون حملو ڪري ٿو ته ملڪ ڊيفالٽ ڪرڻ وڃي رهيو آهي، ائين ڪرڻ سان ڪجهه نه ٿيندو، ان موقعي تي قوم پاران به ردعمل گهرجي، ڪم ڪار جي وقت ۾ تبديلي سان ڪجهه خرابي نه ٿيندي پر اهو سڀ ڪجهه غور فڪر کانپوءِ ڪيو ويو آهي، توانائي بچت قدمن جي ڪري ان سان ماڻهن جي بچت به آهي، حڪومت جي به آهي، پرڏيهي ناڻي جي به بچت ٿيندي. قمر زمان ڪائره چيو ته اسان هن وقت گئس ٻاهران گهرائي رهيا آهيون، تيل ٻاهران گهرائي رهيا آهيون، بجلي پيد اڪرڻ جي لاءِ استعمال ٿيندڙ ڪوئلو به مهانگو آهي ۽ اها سڄي قومي بچت آهي، رات 8 وڳي ڪاروباري مرڪزن جي بندش جي تجويز جي حوالي سان ضرور تنقيد به ڪئي ويندي پر دنيا جي ڪا به ترقي يافته قوم ڏسي وٺو اها جلدي سمهڻ ۽ جلدي اٿڻ واري هوندي، جن قومن ۾ بچت جون اهي قومي عادتون آهن اهي ڪامياب آهن، تيل سان امير ٿيندڙ ملڪن جا مزاج جدا آهن، حڪومت اهي قدم قوم جي تڪليفن جي ڏس ۾ کنيا آهن، ڪافي غور فڪر کانپوءِ توانائي جي بچت جون اهي تجويزون سامهون رکيون ويون آهن، اسان کي ملڪ ۽ قوم جي لاءِ پنهنجون قومي عادتون تبديل ڪرڻيون پونديون، هن وقت اسان جو امپورٽ بل 26 کان 28 بلين ڊالر آهي جيڪو ترتيبوار وڌي رهيو آهي جيڪڏهن اهو اهڙي طرح وڌندو رهيو ته حالتون وڌيڪ خراب ٿينديون. هن چيو ته اسان ماڻهن کي ٻڌائي رهيا آهيون ته اهي قدم لازمي آهن ان کانسواءِ ڪو رستو نه آهي، اسان سڀني کي حڪومت سان تعاون ڪرڻو پوندو. قمر زمان ڪائره چيو ته صوبائي حڪومتن کان، واپاري برادري کان، صنعتڪارن کان به اها ئي اميد ڪريون ٿا ته حڪومتي تجويزن کي ملڪ جي بقاءَ ۽ بچت جو رستو سمجهي اڳتي هلن، ملڪ ۽ قوم جي بهتري لاءِ اهي قدم کنيا پيا وڃن، ان جي ذريعي بهتري جو عمل شروع ٿيندو.
