اسلام آباد۔22فروری(اے پی پی)صدر مملکت ڈاکٹر عارف علوی کوں یوکرین دے صدر ولادی میر زیلنسکی ٹیلی فون کیتے انہاں پاکستان اتے یوکرین دے سیاسی و اقتصادی تعلقات تے الایا۔ ایوان صدر دے پریس ونگ ݙسائے جو ݙوہین رہنماواں روس۔ یوکرین جنگ پاروں ترقی پذیر دنیا کوں درپیش توانائی و خوراک دے مسلیاں تے الایا اتے ݙوہاں ملکاں دے ہکو سویں فیدے کیتے اقتصادی و تجارتی تعلقات ودھاوݨ تے زور ݙتے۔ صدر زیلنسکی اپݨے ݙاہ نکاتی امن فارمولے دا حوالہ ݙیندے یوکرین روس جھیڑا مکاوݨ کیتے اقوام متحدہ دی جنرل اسمبلی اچ ݙتی ونڄݨ آلی قرارداد دے مسودے تے پاکستان دی حمایت منڳی۔ صدر مملکت ڈاکٹر عارف علوی روس۔یوکرین جنگ تے چنتا کریندے آکھیا جو پاکستان اقوام متحدہ دے چارٹر دے مطابق جنگ دے پرامن حل دی حمایت کریندے، حکومت ایں مجوزہ قرارداد دے مندرجات دا جائزہ ڳھندی پئی اے۔ یوکرینی صدر زیلنسکی صدر مملکت ڈاکٹر عارف علوی کوں یوکرین دے دورے دی دعوت وی ݙتی۔
