اسلام آباد-14 آڪٽوبر (اي پي پي) وفاقي گهرو وزير محسن نقوي، پي ٽي آءِ باني سان ملاقات جي اجازت نه پر درخواست جو جائزو وٺڻ جي خاطري ڪرائي هئي. ايس سي او سربراهي ڪانفرنس ۽ سيڪيورٽي خدشن جي روشنيءَ ۾ جيل ۾ سمورن قيدين سان ملاقات تي پابندي آهي، ڪنهن هڪ قيدي کي ملاقات جي اجازت ڏيڻ ٻين قيدين سان ٻٽو معيار ۽ ناروا سلوڪ جي زمري ۾ اچي ٿو. گهرو وزارت جي ترجمان موجب بئريسٽر گوهر علي، وفاقي وزير کي خط لکيو ۽ پي ٽي آءِ باني سان ملاقات جي درخواست ڪئي. گذريل ڏينهن وفاقي وزير سان بئريسٽر گوهر علي جي ٽيليفون تي ڳالهه ٿي. وفاقي وزير درخواست جو جائزو وٺڻ جي خاطري ڪرائي. ملاقات جي اجازت جي خاطري نه ڪرائي وئي.
