اسلام آباد – 21 – آڪٽوبر (اي پي پي) وزيراعظم محمد شهباز شريف 26 هين آئيني ترميم جي منظوري کي قومي يڪجهتي ۽ اتفاق راءِ جو انتهائي شاندار مثال قرار ڏيندي چيو آهي ته 26هين آئيني ترميم سان محلاتي سازشن جو عهد ختم ٿيو آهي ۽ ميثاق جمهوريت جو اڌورو خواب پورو ٿي ويو، آئيني ترميم جي ذريعي جمهوريت جي مٿان خطرا ختم ٿي ويا آهن، پارليامينٽ جي اندر اڳواڻن ذاتي مفاد کان مٿانهون ٿي ملڪ ۽ قوم جي لاءِ عظيم ڪارنامو سرانجام ڏنو آهي، آئيني ترميم پارليامينٽ جي بالادستي جي لاءِ سنگ ميل ثابت ٿيندي، ملڪ جو مستقبل مضبوط ۽ محفوظ هوندو، ترميم سان لکين ماڻهن کي انصاف حاصل ڪرڻ ۾ آساني ٿيندي. قومي اسيمبلي مان 26هين آئيني ترميم جي ٻه ڀاڱي ٽي اڪثريت سان منظوري کانپوءِ ترميم جي حق ۾ ووٽ ڏيندڙ پارٽين جي سربراهن جي سيٽن تي وڃي سندن ٿورا مڃڻ کانپوءِ ايوان ۾ ڳالهائيندي وزيراعظم چيو ته اڄ هڪ تاريخي ڏينهن آهي ۽ قومي يڪجهتي ۽ اتفاق راءِ جو اعليٰ مثال آهي. اڄ هڪ نئون سج اڀرندو ۽ نئين صبح ٿي آهي. ماضي ۾ محلاتي سازشن جي ذريعي چونڊيل وزيراعظمن کي گهر موڪلڻ جو رستو سدائين جي لاءِ بند ٿي ويو آهي. ان آئيني ترميم سان انصاف حاصل ڪرڻ آسان ۽ عام ماڻهو کي انصاف جي فراهمي ۾ دير نه ٿيندي. وزيراعظم چيو ته اڄ 2006ع ۾ بينظير ڀٽو ۽ نواز شريف جي وچ ۾ ٿيندڙ ميثاق جمهوريت جو اڌورو خواب تڪميل تي پهتو آهي، اڄ ڪنهن منحرف ميمبر ان ترميم جي حق ۾ ووٽ ناهي وڌو، اسان تي طرح طرح جا الزام هنيا ويا، اڄ طئي ٿي ويو ته پارليامينٽ بالادست آهي. هن چيو ته ماضي ۾ پاناما جي نالي تي اقامي جي بنياد تي هڪ وزيراعظم کي نااهل قرار ڏنو ويو. هن صدر آصف علي زرداري، اڳوڻي وزيراعظم نواز شريف، بلاول ڀٽو زرداري، مولانا فضل الرحمان، خالد مقبول صديقي، چوڌري سالڪ حسين، عبدالمالڪ بلوچ، اعجاز الحق، خالد مگسي، عبدالعليم خان سميت آئيني ترميم جي حمايت ڪندڙ سمورن اڳواڻن جا ٿورا مڃيندي چيو ته اهڙي ترميم سان ملڪ جو مستقبل محفوظ ٿيندو. هن بينظير ڀٽو کي خراج عقيدت ۽ ميان نواز شريف کي خراج تحسين پيش ڪيو جن ان جو بنياد رکيو. وزيراعظم چيو ته بلاول ڀٽو زرداري ان ترميم جي لاءِ بي پناهه محنت ڪئي، مولانا فضل الرحمان پاڪستان جي وسيع تر مفاد ۾ ان تي پنهنجو موقف ڏنو. هن نائب وزيراعظم، قانون ۽ انصاف واري وفاقي وزير کي پڻ مبارڪباد ڏني. وزيراعظم چيو ته جيڪڏهن تحريڪ انصاف به ان ترميم ۾ شامل ٿئي ها ته سٺو هو. هن اسپيڪر ۽ سندس اسٽاف جا به ٿورا مڃيا. وزيراعظم سمورن قومي اسيمبلي جا ٿورا مڃيندي ان ترميم کي هڪ اهم سنگ ميل قرار ڏنو.
