ميانوالي – 11 ڊسمبر (اي پي پي) وزيراعظم عمران خان چيو آهي ته پاڪستان جا فيصلا عوامي امنگن موجب ڪيا ويندا، مسئلن جي حل لاءِ سڀني سان ڳالهين لاءِ تيار آهيون، قانون جي بالادستي کانسواءِ قومون تباهه ٿي وينديون آهن، ملڪ کي ڦريندڙن کي نه اين آر او ڏينداسين نه مفاهمت ڪنداسين، مهذب معاشرن ۾ چورن سان ڊيل ناهي ڪئي ويندي، وقت ثابت ڪندو ته آئون قوم کي مايوس نه ڪندس، ماضي ۾ ڪنهن حڪومت ڪڏهن غريبن بابت ناهي سوچيو، اسان جي 5 سالا حڪومت جي دور ۾ پٺتي پيل علائقن جي سڀ کان وڌيڪ ترقي ٿيندي، مهانگائي پوري دنيا جو مسئلو آهي، مهانگائي جو سڀ کان وڏو سبب ڪورونا جي عالمي وبا آهي، ڪورونا جي ڪري واپار گهٽ ٿيو ۽ شين جون قيمتون وڌي ويون پر اڄ به پاڪستان دنيا ۾ سڀ کان سستو ملڪ آهي، ٽن کان چئن مهينن دوران شين جون قيمتون گهٽ ٿيڻ شروع ٿي وينديون، مارچ تائين پنجاب ۾ هر خاندان کي صحت ڪارڊ جي سهولت دستياب هوندي، گهر جي تعمير لاءِ بنا وياج جي قرض ڏنا پيا وڃن، 62 لک کان وڌيڪ نوجوانن کي اعليٰ تعليم جي لاءِ 47 ارب رپين جا وظيفا ڏنا پيا وڃن، نوجوان ايندڙ بلدياتي چونڊن جي تياري ڪن ۽ چونڊن ۾ ڀرپور شرڪت ڪن، ماضي جي حڪومتن بجلي جا مهانگا منصوبا لڳايا، اسان جي حڪومت جي دور ۾ ميانوالي ۾ رڪارڊ ترقي ٿيندي، ميانوالي جي عوام جي خدمت ڪري انهن جو احسان لاهيندس، ميانوالي ۾ تعمير ٿيندڙ نمل يونيورسٽي پاڪستان جي آڪسفورڊ يونيورسٽي هوندي جنهن ۾ پوري ملڪ مان شاگرد تعليم جي لاءِ ايندا. اهڙن خيالن جو اظهار وزيراعظم عمران خان ميانوالي ۾ عوامي ميڙ کي خطاب ڪندي ڪيو. ان موقعي تي هن جلسي گاهه ۾ پنهنجي ۽ ڪارڪنن جي وچ ۾ فاصلي تي گلا به ڪئي. هن ڪارڪنن جا خاص ٿورا مڃيندي چيو ته اڄ جيڪڏهن آئون وزيراعظم آهيان ته ان ۾ سڀ کان وڌيڪ ڪردار ميانوالي جي ڪارڪنن جو آهي. وزيراعظم چيو ته جڏهن اسان جي حڪومت جا 5 سال مڪمل ٿيندا ته پٺتي پيل علائقن ۾ سڀ کان وڌيڪ ۽ تاريخي ترقي هوندي، جيڪا ماضي ۾ نه ٿي. هن چيو ته مون ميانوالي جي عوام سان واعدو ڪيو هو ته بکر، ڊيره اسماعيل خان، ميانوالي ۽ قبائلي علائقن سميت پاڪستان جي پٺتي پيل علائقن کي ترقي ڏني ويندي ڇو ته سهولتون نه ملڻ جي ڪري پٺتي پيل علائقن جي عوام غريب کان غريب تر جڏهن ته امير طبقو امير ترين ٿي ويو. هن چيو ته منهنجي ڪوشش آهي ته پٺتي پيل علائقن کي پنهنجي حڪومت جي دور ۾ سڀ کان وڌيڪ ترقي ڏني وڃي. وزيراعظم عمران خان چيو ته آئون تعليم تي سڀ کان وڌيڪ ڌيان ڏئي رهيو آهيان ته جيئن اسڪولن ۾ تعليم جو معيار بهتر ٿئي ۽ عورتن کي به بهترين تعليم ملي سگهي. هن چيو ته نمل يونيورسٽي اقتدار ۾ اچي نه پر حڪومت کان اڳ پئسو گڏ ڪري تعمير ڪئي جنهن جو مقصد ملڪ جي نوجوانن کي معياري تعليم جي فراهمي هو. هن چيو ته نمل يونيورسٽي ۾ پوري ملڪ مان نوجوان تعليم حاصل ڪري رهيا آهن ۽ مستقبل ۾ به ڪندا هتي اعليٰ تعليم معيار موجب ڏني وڃي ٿي ۽ نمل يونيورسٽي ملڪ جي آڪسفورڊ يونيورسٽي بڻجندي. وزيراعظم عمران خان ميانوالي، بلڪسر ۽ مظفر ڳڙهه رستي جي حوالي سان چيو ته ٽريفڪ وڌيڪ هجڻ سبب ان تي حادثا ٿيندا هئا پر هاڻي ان جي تعمير سان سفر جي بهترين سهولت ملندي ۽ اهو منصوبو ڏيڍ سال ۾ مڪمل ٿيندو. وزيراعظم عمران خان چيو ته پاڪستان سميت دنيا جو سڀ کان وڏو مسئلو مهانگائي آهي جنهن جو سبب ڪورونا جي وبا ۽ لاڪ ڊائونز آهن. هن چيو ته عالمي سطح تي ڪورونا جي ڪري ڪاروبار بند ٿيا ۽ واپار ۾ به گهٽتائي آئي جنهن سان پيداوار به متاثر ٿي ۽ قيمتن ۾ اضافو ٿي ويو. هن چيو ته اهو رڳو اسان جو مسئلو نه آهي پر پوري دنيا جو مسئلو آهي. وزيراعظم آمريڪا جو مثال ڏيندي چيو ته 1982ع کانپوءِ ڪورونا جي ڪري آمريڪا ۾ سڀ کان وڌيڪ مهانگائي ٿي آهي پر پاڪستان اڃا به سڀ کان سستو ملڪ آهي. هن چيو ته ايندڙ ٽن کان چئن مهينن دوران قيمتن ۾ گهٽتائي ٿيندي. وزيراعظم عمران خان چيو ته قيمتن ۾ اضافي سان عوام کي ريليف ڏيڻ جي لاءِ 50 هزار رپيا ماهوار کان گهٽ آمدني واري پاڪستان جي اڌ آبادي کي اٽو، گيهه ۽ دالين وغيره تي 30 سيڪڙو سبسڊي ڏينداسين، احساس راشن پروگرام تحت انهن جي لاءِ قيمتون گهٽ هونديون. وزيراعظم وڌيڪ چيو ته حڪومت ڪامياب پاڪستان پروگرام آڻي رهي آهي جنهن تحت 20 لک ڪمزور ترين خاندانن کي 5 لک رپين تائين بنا وياج جي قرض ڏنا ويندا، ان کانسواءِ آبادگارن کي ڳوٺن ۽ شهر ۾ ڪاروبار جي لاءِ بنا وياج جي قرض ۽ گهر جي تعمير لاءِ 27 لک رپين تائين جو بنا وياج جي قرض ڏنو ويندو. هن چيو ته ايندڙ سال مارچ تائين پوري پنجاب صوبي ۾ هر خاندان کي انصاف صحت ڪارڊ جي سهولت حاصل هوندي. هن چيو ته صوبي جي هر خاندان وٽ 10 لک رپين جي هيلٿ انشورنس هوندي ۽ اهي نجي ۽ سرڪاري اسپتالن مان مفت علاج ڪرائي سگهندا. هن چيو ته جيڪڏهن غريب خاندان ۾ بيماري ٿئي ته اهو مقروض ٿي وڃي ٿو. وزيراعظم عمران خان چيو ته نوجوانن جي تعليم جي لاءِ پاڪستان جي تاريخ جي سڀ کان وڏي اسڪالرشپ آڻي رهيا آهيون ۽ نوجوانن کي 47 لک رپين جا وظيفا ميرٽ تي ڏنا ويندا ته جيئن اعليٰ تعليم حاصل ڪرڻ جي خواهشمند غريب خاندانن جي 62 لک نوجوانن کي اسڪالرشپ ملي سگهي. وزيراعظم چيو ته مون پنهنجي چونڊ مهم دوران واعدو ڪيو هو ته پاڪستان ڪنهن جي آڏو ڪنڌ نه جهڪائيندو اسان هڪ آزاد ملڪ آهيون ۽ ڪڏهن به ڪنهن جي غلامي نه ڪنداسين، پنهنجي پيرن تي بيهي پنهنجا فيصلا پاڻ ڪنداسين. هن چيو ته ماضي ۾ آزاداڻا فيصلا نه ڪيا ويا پر هاڻي پاڪستان ۾ عوام جي بهتري ۽ ڀلائي جا فيصلا ٿيندا. وزيراعظم عمران خان واضح ڪيو ته اسان سڀني سان ڳالهين لاءِ تيار آهيون ۽ مختلف نظريا رکندڙن سان به ڳالهين جي لاءِ راضي آهيون اسان گڏجي ويهي پرامن طريقي سان مسئلن جو حل چاهيون ٿا. هن چيو ته بلوچستان، وزيرستان ۽ اڳوڻن قبائلي علائقن جا مسئلا به ڳالهين سان حل ڪنداسين. وزيراعظم چيو ته ملڪ جي عوام جو پئسو چوري ڪندڙن ۽ ان کي ٻاهرئين ملڪ منتقل ڪندڙن سان مفاهمت نه ڪنداسين. هن چيو ته اسان جي نبي ڪريم ﷺ چيو هو ته جنهن قوم ۾ قانون جي حڪمراني ۽ بالادستي نه هجي اها تباهه ٿي وڃي ٿي ڇو ته وڏن وڏن ڌاڙيلن کي اين آر او ڏيندڙ قومون ڪڏهن ترقي نه ٿيون ڪري سگهن. هن چيو ته سڀني سان مفاهمت جي لاءِ تيار آهيون پر اقتدار ۾ رهي ڪرپشن ڪندڙن، پئسو چوري ڪندڙن ۽ ان کي ٻاهر موڪليندڙن سان حڪومت ڪڏهن به مفاهمت نه ڪندي. هن چيو ته جڏهن چوري کي خراب نه سمجهيو وڃي ته ڪير به محنت ناهي ڪندو جنهن سان ملڪ ترقي نه ٿو ڪري سگهي. وزيراعظم چيو ته هر مهذب معاشري ۾ چورن کي جيلن ۾ وڌو وڃي ٿو ۽ انهن سان ڊيل نه ٿي ڪئي وڃي، خوشحال ملڪن ۾ قانون جي بالادستي آهي جڏهن ته غريب ملڪن ۾ طاقتور جي لاءِ جدا ۽ غريب جي لاءِ جدا قانون آهي. هن چيو ته اسان جي نبي ڪريم ﷺ واضح ڪيو هو ته جيڪڏهن منهنجي ڌيءَ به چوري ڪندي ته ان کي به سزا ملندي. وزيراعظم عمران خان چيو ته اسان کي حضور نبي ڪريم ﷺ جي زندگي مان سکڻ گهرجي. پاڻ ﷺڪهڙن اصولن تي مديني جي رياست قائم ڪئي، ان ۾ ئي اسان جي بهتري آهي. هن چيو ته پاڪستان ۾ مديني جي رياست جي اصولن تي هلنداسين، قانون جي حڪمراني ۽ فلاحي رياست جي بنيادي نظرن تي عمل پيرا ٿي ملڪ کي مٿي اٿارينداسين ۽ پاڪستانين کي هڪ عظيم قوم بڻائينداسين. پنهنجي خطاب جي آخر ۾ وزيراعظم عمران خان وڌيڪ چيو ته جيڪڏهن توهان ماڻهو مون سان گڏ نه هجو ها ته اڄ آئون هتي بيٺل نه هجان ها، توهان سدائين منهنجو ساٿ ڏنو آهي ۽ منهنجو واعدو آهي ته توهان کي ڪڏهن مايوس نه ڪندس، پاڪستان هڪ عظيم خواب جي تڪميل جو نالو آهي، انهي خواب تي قوم کي هڪ عظيم قوم بڻائيندس. وزيراعظم عمران خان چيو ته مهاڙ جي لاءِ واهه جي تعمير کانسواءِ سولر ٽيوب ويلز سميت پاڻي جي دستيابي جي ٻين وسيلن جو جائزو وٺي رهيا آهيون ته جيئن آبادگار مهانگي بجلي کان بچي سگهن. هن چيو ته بدقسمتي سان مهانگي بجلي جا سمورا معاهدا ماضي جي حڪومتن ڪيا. وزيراعظم عمران خان نوجوانن تي زور ڏنو ته اهي ايندڙ بلدياتي چونڊن جي تياري ڪن ۽ چونڊن ۾ ڀرپور شرڪت ڪن. ان کان اڳ ميانوالي پهچڻ تي وزيراعظم عمران خان عوامي ڀلائي جي اربين رپين جي مختلف ميگا ترقياتي منصوبن جو افتتاح ڪيو ۽ پيڙهه جو پٿر رکيو. جلسي کي پنجاب جي وڏي وزير سردار عثمان بوزدار ۽ قومي اسيمبلي ميمبر امجد علي خان پڻ خطاب ڪيو. جلسي ۾ ميانوالي سميت علائقي جي عوام ۽ خاص طور تي نوجوانن ڀرپور شرڪت ڪئي.
