اسلام آباد۔17جولائی (اے پی پی) وفاقی وزیر آئی ٹی تے ٹیلی کمیونیکیشن سید امین الحق آکھیا جو غیر قانونی قرضہ ایپلی کیشن دےخلاف سخت کارروائی شروع کر ݙتی ڳی اے۔ چیئرمین پی ٹی اے میجرجنرل (ریٹائرڈ )حفیظ الرحمان کوں ایں سویں ایپلی کیشنز دے خلاف فوری کارروائی کرݨ دی ہدایت کیتی اے۔ ہدایت تے فوری عمل دے تحت ہݨ تئیں 43 غیر قانونی ایپلی کیشنز کوں بلاک کیتا ڳے۔ وفاقی وزیر آئی ٹی سید امین الحق سنوار کوں اپݨے ہک بیان اچ آکھیا جو فیس بک اتے ٻے سوشل پلیٹ فارمز توں قرضہ ݙیوݨ آلے مافیا سادہ لوکاں کوں بلیک میل کریندے پن، پی ٹی اے دے اقدمات اچ ایس ای سی پی نال مشورہ تے تعاون شامل اے۔ انہاں آکھیا جو صارفین کوں ݙساوݨ کیتے وی مہم چلائی ونڄے تانجو او بلیک میل مافیا دا شکار نہ ٻݨݨ۔ عوام ایں سویں ایپلی کیشنز دی شکایت پی ٹی اے، ایف آئی اے سائبر کرائم اتے مقامی پولیس کوں ݙیون۔ وفاقی وزیر آئی ٹی سید امین الحق ڈائریکٹر جنرل ایف آئی اے نال وی رابطہ کیتا اتے جعلی آن لائن کمپنیاں دے خلاف ہݨ تئیں دی کاروائیاں تے بریفنگ ڳھدی۔
