صحبت پور۔4جنوری (اے پی پی) وزیراعظم محمد شہباز شریف صحبت پور اچ چھل متاثرین اتے عمائدین نال خطاب اچ دانش سکول رحیم یار خان دی طالبہ دی داستان سݨ تے آبدیدہ تھی ڳے۔ بدھ کوں ہک ݙینھ دے دورے تے وزیراعظم بلوچستان اچ 12 دانش سکول ٻݨاوݨ دا اعلان کریندیں ہوئیں آکھیا جو پنجاب اچ 2008 اچ جݙاں دانش سکول ٻݨائے تاں رحیم یار خان اچ ٻݨے دانش سکول دے دورے دے موقع تے ہک ٻالڑی جئیں دا ناں عائشہ ہئی، نال ملاقات تھئی جئیں ݙسیا جو اوندی اماں اتے ابا ݙوہیں وفات پا ڳن۔ او چار ٻھیݨیں بھرا ہن، اوندا خواب ہئی جو او ڈاکٹر ٻݨے پر اوں کنے تعلیم دے وسائل کائنا ہن۔ او ہݨ اتھاں جدید سہولتاں دے سکول اچ پڑھدی پی اے تاں او ہر ݙینھ رات کوں اپݨے پیو دے تصور نال ڳالھیں کریندی اے جو ہݨ او ڈاکٹر ٻݨ تے انہاں دی خواہش پوری کریسی۔ وزیراعظم ایں موقع تے آبدیدہ تھی ڳے۔
