اسلام آباد۔21مارچ (اے پی پی):پاکستان اچ امریکا دے سفیر ڈونلڈ بلوم آکھیے ساݙا مضبوط تے پائیداراشتراک پاکستانی اتے امریکی عوام دی زندگیاں اچ بہتری گھن آندا رہسی عالمی سطح تے مثبت اثرات پیسی ، یو ایس پاکستان گرین الائنس ایندی ھک بہترین مثال اے۔ اوسینٹر فار ایرو اسپیس اینڈ سکیورٹی اسٹڈیز دے اہتمام نال “پاکستان امریکا تعلقات: دی وے فارورڈ” دے موضوع تے خطاب کریندے پئے ہن ۔ امریکی سفیر ݙوہی ملکاں وچال 75سالہ ݙوپاسے تعلقات، خاص طور تے ݙھاکیں تے محیط ترقیاتی اشتراک تے ڳالھ مہاڑ کیتی ۔ انہاں ملک اچ سکولاں ، ہسپتالاں اتے شاہراہواں دی تعمیر دے نال نال سکالرشپ پروگراماں دے ذریعے تعلیم کیتے معاونت دیاں کوششاں کوں اجاگر کیتا۔ انہاں مزید آکھیے ٻاہرلے ملک رہݨ آلے پاکستانیاں ذاتی تے پیشہ ورانہ رابطے دا ھک ایجھا نیٹ ورک بݨائے جیں پاک امریکا تعلقات دی بنیاد کوں مزید تکڑا کیتے ۔ انہاں قدرتی آفات نال نبݨݨ سانڳے کیتے ڳئے اقدامات تے ڳالھ کریندے ہوئیں 2005 دے زلزلے اتے 11-2010 توں گھن تے اڄوکے (2022) دے سیلاب توں آوݨ آلی تباہی دے اثرات کوں گھٹ کرݨ کیتے امداد ݙیوݨ کوں یقینی بݨاوݨ دی لوڑھ تے زور ݙتا ۔ لیکچر دے بعد سفیر تے شرکا وچال سوال و جواب دا دور تھیا جیں اچ حاضر سروس اتے ریٹائرڈ فوجی افسران، ماہرین تعلیم اتے سفارت کار شامل ہن ۔ اپݨے اختتامی کلمات اچ صدر کیس ایئر مارشل (ریٹائرڈ) فرحت حسین خان مہمان دا شکریہ ادا کیتا تے امید ظاہر کیتی جو پاک امریکا تعلقات دی مضبوط بنیاداں انہاں دے ݙو پاسے تعلقات خاص طور تے جامع اقتصادی ترقی اتے علاقائی امن کوں مزید ودھارا ݙیسن ۔
